திவ்யாங் சஹாரா யோஜனா மற்றும் திவ்யாங்ஜன் கௌஷல் யோஜனா சூழல்: பட்ஜெட்டுக்கு பிந்தைய இணையவழி கருத்தரங்கில், பிரதமர் 'திவ்யாங் சஹாரா யோஜனா' மற்றும் 'திவ்யாங்ஜன் கௌஷல் யோஜனா' ஆகிய திட்டங்களை முன்னிலைப்படுத்தினார். இந்த இரண்டு திட்டங்களும் சமூக நீதி மற்றும் அதிகாரமளித்தல் அமைச்சகத்தின் கீழ் மத்திய பட்ஜெட் 2026–27-இல் அறிமுகப்படுத்தப்பட்டன. திவ்யாங் சஹாரா யோஜனா (Divyang Sahara Yojana) மாற்றுத்திறனாளிகளை (திவ்யாங்ஜன்) வலுவூட்டுவதற்காக, நவீன உதவி உபகரணங்களை எளிதில் கிடைக்கச் செய்வதே இத்திட்டத்தின் நோக்கமாகும். செயற்கை அவயவங்கள் உற்பத்தி செய்யும் இந்தியக் கழகத்திற்கு (ALIMCO) செயற்கை நுண்ணறிவு (AI) மற்றும் மேம்பட்ட தொழில்நுட்பங்களை ஒருங்கிணைத்து, உற்பத்தியை அதிகரிக்க இத்திட்டம் ஆதரவளிக்கும். பயனாளிகள் தங்களுக்குத் தேவையான உதவி உபகரணங்களைப் பார்த்து, சோதித்து, தேர்வு செய்யக்கூடிய வகையில் சில்லறை விற்பனை நிலையங்களைப் போன்ற மையங்கள் அமைக்கப்படும். ஏற்கனவே உள்ள பிரதமர் திவ்யாஷா-வயஸ்ரீ கேந்திரங்கள் (PMDVKs) விரிவாக்கம் செய்யப்பட்டு, அவற்றின் மூலம் மதிப்பீடு (assessment), தனிப்பயனாக்கம் (customization) மற்றும் பராமரிப்புச் சேவைகள் வழங்கப்படும். திவ்யாங்ஜன் கௌஷல் யோஜனா (Divyangjan Kaushal Yojana) மாற்றுத்திறனாளிகளுக்கு கண்ணியமான வாழ்வாதார வாய்ப்புகளை உருவாக்க, தொழில்துறைக்குத் தேவையான திறன் பயிற்சிகளை இத்திட்டம் வழங்குகிறது. தகவல் தொழில்நுட்பம் (IT), அனிமேஷன், விஷுவல் எஃபெக்ட்ஸ், கேமிங் மற்றும் காமிக்ஸ் (AVGC), விருந்தோம்பல் (hospitality) மற்றும் உணவு மற்றும் பானங்கள் (food & beverages) போன்ற துறைகளில் இத்திட்டம் கவனம் செலுத்துகிறது. இத்திட்டத்தின் கீழ் திறன் பயிற்சிக்கான பதிவு, மாற்றுத்திறனாளிகள் அதிகாரமளித்தல் துறையின் (DEPwD) 'பிஎம்-தக்' (PM-DAKSH) இணையதளத்துடன் ஒருங்கிணைக்கப்பட்டுள்ளது.
